Azərbaycanlı gənclər UNESCO-nun foto-müsabiqəsində iştirak etməyə dəvət olunurlar

UNESCO-da “İpək Yolu gənclərin gözü ilə” 3-cü foto-müsabiqə keçiriləcək.

Hər il keçirilən “İpək Yolu gənclərin gözü ilə” adlı foto-müsabiqə İpək Yolu üzərində olan mədəni irs abidələri ilə bağlı baxışları kameraların obyektivi ilə əks etdirmək üçün yaxşı fürsətdir.

Gənclər tərəfindən çox vaxt ünsiyyət və özünü ifadə üçün güclü vasitə kimi istifadə edilən vizual sənətlər, xüsusilə də foto qloballaşan dünyamızın üzləşdiyi əsas məsələlər barədə məlumatlılığın artırılmasında əhəmiyyətli rol oynamaq potensialına malikdir.

Dünyanın bəlası olan pandemiya zamanı çoxsaylı təhsil və mədəniyyət ocaqlarının müvəqqəti bağlandığı bir dövrdə bu foto müsabiqə gənclərin bir-birləri ilə rəqəmsal məkanda əlaqə qurmaq və yaradıcılıqlarını, eləcə də post-pandemiya dünyamızı görmə qabiliyyətlərini bölüşmək üçün ideal platformadır.

UNESCO-nun İpək Yolu Proqramı çərçivəsində təşkil edilən foto-müsabiqəyə avqustun 24-dək müraciət olunmalıdır. Müsabiqə 14-17 və 18-25 yaş qruplarına bölünür. Müsabiqəyə “Tekstil və geyim” və “COVID-19 pandemiyası dövründə mədəniyyətlərarası mübadilə, o cümlədən tekstil və geyim” adlı iki mövzu ilə bağlı fotolar göndərmək tövsiyə olunur. Sonda Türkiyə, Banqladeş, Böyük Britaniya, Çin, Efiopiya və Meksikadan olan fotoqraflardan ibarət münsiflər heyəti qalibləri seçəcək.

Azərbaycanın gənc fotoqrafları da müsabiqədə iştirak etməyə dəvət olunurlar. İştirak etmək üçün, İştirak səhifəsinə daxil olub maksimum 20 fotoşəkil yükləmək lazımdır. Hər bir foto yaxud seriya fotolar üçün qeydləri yazmağı unutmayın. JPEG yaxud JPG formatlarıda olacaq fotoşəkillər minimum 1,500 x 1,500 pikseldə olmalıdır.  

Foto-müsabiqə ilə bağlı UNESCO-nun internet saytında aşağıdakı linkdə daha ətraflı məlumat almaq olar: https://unescosilkroadphotocontest.org/fr  .

Əlavə suallar üçün [email protected]  elektron ünvanına müraciət oluna bilər.

Mənbə: https://azertag.az/

Bizi sosial şəbəkələrdə izləyin:
Facebook: facebook.com/creative.az
Instagram: https://www.instagram.com/kreativaze/
LinkedIn: https://www.linkedin.com/company/kreativaze
Telegram: https://t.me/kreativaz
Twitter: https://twitter.com/KreativAze
YouTube: https://www.youtube.com/channel/UCII97qTJr7vnHGqrT16LdvA