İSESKO “Distant Mədəniyyət” adlı proqram (Digital Cultural Programme) elan etmişdir

İslam Dünyası Təhsil, Elm və Mədəniyyət (İSESKO) Təşkilatı "İSESKO Rəqəmsal Evi" (ICESCO Digital Home) proqramı çərçivəsində “Distant Mədəniyyət” adlı xüsusi proqrama başlayır.

Proqram özündə bacarıqların artırılmasını, yaradıcılıq istedadlarının həvəsləndirilməsini və İSESKO mükafatlarının ayrılmasını ehtiva edən dayanıqlı təhsil, elmi və mədəni tədbirlərin keçirilməsi üçün alternativ həll yollarının tapılmasına yönəlmişdir.

Pandemiya dövründə irs sahəsində çalışan mütəxəssislərə yönəlmiş təlimlərdən ibarət olan bu proqrama 15 aprel 2020-ci il tarixindən etibarən start veriləcəkdir.

Proqramın əsas məqsədi mədəni irs sahəsində bacarıqları inkişaf etdirmək və yaradıcı potensialı stimullaşdırmaqdır. Bundan əlavə, bu təşəbbüs ISESKO-nun rəsmi saytında mövcud olan rəqəmsal kitabxanalar vasitəsilə elektron kitablardan faydalanmaq imkanını da təmin edir.

Proqram çərçivəsində İSESKO irs sahəsində çalışan işçilərin distant təlimi və onların irs üzrə bacarıqlarının inkişaf etdirilməsi məqsədilə 15 aprel 2020-ci ildən etibarən maddi və qeyri maddi mədəni irs sahəsi üzrə (mədəni irsin sənədləşdirilməsi, islam dünyasında muzey idarə edilməsinin ümumi prinsiplərinin tətbiqi, sualtı mədəni irsin qorunması və s.) video dərslər yayımlamağa başlayacaqdır.

Elan olunan proqram çərçivəsində həmçinin tələbələr arasında 3 kateqoriya üzrə müsabiqə keçiriləcəkdir:

1. 5-10 səhifəlik qısa hekayələrin yazılması;
2. Rəsm əsərinin yaradılması;
3. Yaradıcı məhsulun yaradılması.

Üzv dövlətlərin komissiyaları göstərilən kateqoriyalar üzrə ən yaxşı işləri seçərək cari ilin iyun ayının sonunadək İSESKO-ya göndərəcəklər. Sonda İSESKO tərəfindən yaradılmış münsiflər heyəti göndərilmiş layihələr arasından 3 ən yaxşı layihəni seçərək qalib elan edəcəkdir.

1-ci yer – 6000 ABŞ dolları

2-ci yer – 4000 ABŞ dolları

3-cü yer – 2000 ABŞ dolları

Proqram haqqında ətraflı məlumatla aşağıdakı linkdə tanış ola bilərsiniz:

https://www.icesco.org/en/2020/04/01/icesco-earmarks-nine-individual-prizes-for-creative-students-and-provides-training-programs-in-distance-culture-initiative/

Qeyd olunan layihələr AR Mədəniyyət Nazirliyi yanında fəaliyyət göstərən İSESKO üzrə Azərbaycan Respublikasının Milli Komissiyasına göndərilməlidir.

Email: [email protected]